თუ შვილთან/შვილებთან მუდმივი ჩხუბი გიწვეთ ამა თუ იმ გაჯეტის გამო, გირჩევთ შეცვალოთ მეთოდი და ჩხუბის ნაცვლად თანამშრომლობაზე გადახვიდეთ.
მოზარდი ყურსასმენებით, ტელეფონში ჩაფლული, თითქმის არაფერზე რეაგირებს - მართლაც ძალიან გამაღიზიანებელ სანახაობაა ნებისმიერი მშობლისთვის, არადა, მსგავსი სიტუაცია ლამის ყველა ოჯახში ნორმად არის ქცეული, რაც ძალიან ხშირად ჩხუბისა და სკანდალების მიზეზი ხდება ხოლმე.
მეორე მხრივ გასაკვირი არაფერია იმაში, რომ თუ მოზარდს ეძლევა საშუალება მუდმივად ხაზზე იყოს და კონტაქტი დაამყაროს თანატოლებთან, ის ამ შანსს აუცილებლად გამოიყენებს.
მშობელი კი ნერვიულობს იმაზე, რომ მუდმივად ტელეფონში თავჩარგული ბავშვი ზიანს აყენებს საკუთარ ჯანმრთელობას და ფსიქიკას. ცუდად აისახება ეს მის სწავლაზეც. გარდა ამისა, სოციალურმა ქსელებმა შესაძლოა ბევრი პრობლემა წარმოქმნას მის ცხოვრებაში ისეთი, როგორიც არის მაგალითად არასასიამოვნო ნაცნობობა, ბულინგი და ა.შ. ბავშვთა აღზრდის სპეციალისტები მოზარდის მშობლებს აძლევენ რეკომენდაციას, რომ წინააღმდეგობის ნაცვლად უმჯობესია თანამშრომლობაზე გადავიდნენ და ისე აღმოფხვრან ეს პრობლემა. ეს მეთოდი ბევრად ეფექტური იქნება, ვიდრე მშობლის დიქტატურა. ამისთვის კი საჭიროა პირველ რიგში ის, რომ მშობელმა დაიწყოს საკუთარ თავზე მუშაობა.
შეეგუეთ და გაითავისეთ ის ფაქტი, რომ რაც უფრო დიდია თქვენი შვილი, მით ნაკლები ბერკეტი გაქვთ მის გასაკონტროლებლად, ეს ეხება როგორც რეალურ, ისე ციფრულ სამყაროს. ძალიან მნიშვნელოვანია, რომ ეს კონტროლი თავად მოზარდს გადააბაროთ, მან თავად მიიღოს საპასუხისმგებლო გადაწყვეტილებები და არეგულიროს მისის ონლაინ აქტივობები. იმისათვის, რომ წარმატებით გაიაროთ კონტროლიდან ნდობამდე მიმავალი საკმაოდ რთული გზა, პირველ რიგში უნდა ისწავლოთ საკუთარი რეაქციების გაკონტროლება ტელეფონში ჩაფლული მოზარდის დანახვისას. რამდენჯერაც საყვედური მიცემას და აზრის გამოხატვას დააპირებთ, ამ დროს გირჩევთ გააკეთოთ პაუზა და მოუსმინოთ საკუთარ თავს. გააცნობიერეთ კიდევ ერთხელ, რამდენად გინდათ მუდმივად აკონტროლოთ მოზარდი და ყველაფერი ის, რასაც ის აკეთებს. რამდენად მართებულია ამის გაკეთება? ნაცვლად იმისა, რომ დაუშალოთ სქროლვა, უბრალოდ შესთავაზეთ გარეთ ერთად გასეირნება, სპორტული აქტივობებით დაკავება, სამაგიდო თამაშები, მეგობარებთან ერთად გაესირნება და სხვ.
მოზარდთან ურთიერთობის მთავარი ფაქტორი ურთიერთობაა. ეცადეთ იყოთ ცნობისმოყვარე და დაუსვათ მას შეკითხვები, რომლებიც მისთვისაც აქტუალური იქნება, მაგალითად, რომელ სოციალურ ქსელს ანიჭებს უპირატესობას და რატომ, რა შეიძლება იყოს ამა თუ იმ ქსელის თუ პროგრამის დადებითი თუ უარყოფითი მხარე, რა მოხდება, მთელი დღე ტელეფონის გარეშე რომ იყოს და ა.შ. მუდმივად შეახსენეთ საკუთარ თავს, რომ ეს დისკუსია არ არის, თქვენ ბავშვს ჭკუა კი არ უნდა დაარიგოთ და ასწავლოთ, უბრალოდ უკეთ უნდა გაუგოთ და ეთანამშრომლოთ. მოზარდმა არავითარ შემთხვევაში არ უნდა იფიქროს, რომ მის რომელიმე პასუხს სერიოზულად არ აღიქვამთ, არასწორად მიიჩნევთ და არ მოგწონთ.
იმისათვის, რომ ბავშვმა თავად დაარეგულიროს საკუთარი სოციალური აქტივობა და მეორე მხრივ მინიმუმამდე დაიყვანოთ ამასთან დაკავშირებული რისკები, შეიმუშავეთ საერთო გონიერი გეგმა. თითოეული პუნქტის განხილვის დროს მიეცით მოზარდს საშუალება გამოხატოს საკუთარი მოსაზრება, მხოლოდ საკუთარი აზრებით ნუ იხელმძღვანელებთ.
აუცილებლად დაუთმეთ ყურადღება შემდეგ თემებს და ერთად განიხილეთ:
• სად, როდის და რამდენ ხანს შეიძლება იჯდეს ტელეფონში, რათა ეს იყოს ადეკვატური და შესაფერისი მოქმედება.
• როგორ შეინარჩუნოს უსაფრთხოება ქსელში
• რა უნდა იცოდეს სოც. ქსელებში აქტიურობის ეთიკის შესახებ
• რისი დაპოსტვა შეიძლება და რისი არა
• როგორ გაიგოს, რომელი ინფორმაცია არის სანდო და რომელი არა
მოზარდისადმი მსგავსი დამოკიდებულების წყალობით ის მიხვდება, რომ თქვენ მას ენდობით და აღიქვამთ როგორც ზრდასრულ, გონიერ და შეგნებულ ადამიანს და ყველაფერს აკეთებთ არა იმისთვის, რომ უბრალოდ ასე გინდათ და მასზე უფროსი ხართ, არამედ მისი უკეთესი მომავლისთვის და თანაც - მასთან ერთად იღებთ გადაწყვეტილებებს და არა მის გარეშე. მსგავსი მიდგომა მისთვის ძალიან სასარგებლო და საჭიროა. ეს მას თვითრწმენას შემატებს, რაც ასე მნიშვნელოვანი მისი სამომავლო განვითარებისთვის.
ასევე დაგაინტერესებთ:
სკოლები 
საბავშვი ბაღები 
განმავითარებელი წრეები 
სტარტაპერები 
შოპინგი 
ექიმები 
დასვენება 
გართობა 