პარტნიორის მხარდაჭერა ლაქტაციის პროცესში

ძუძუთი კვების პროცესში პარტნიორის მხარდაჭერა ძალიან მნიშვნელოვანი ფაქტორია. ამ მხარდაჭერას დიდი გავლენის მოხდენა შეუძლია დედის გადაწყვეტილებაზე, დაიწყოს და ხანგრძლივად შეინარჩუნოს ძუძუთი კვების პროცესი. ერთ-ერთი კვლევის თანახმად, ოჯახებში, სადაც მამები ბავშვის დაბადებამდე ინფორმაციას იღებდნენ ძუძუთი კვების სირთულეებთან დაკავშირებით, დედები 5-ჯერ უფრო მეტი ალბათობით აგრძელებდნენ ძუძუთი კვებას 6 თვემდე. მამების გარდა ამ პროცესზე დადებითი გავლენა დოულას დახმარებასაც შეუძლია.

კონკრეტულად რისი გაკეთება შეუძლია პარტნიორს ძუძუთი კვების პროცესში დასახმარებლად?

მოიძიეთ ხელმისაწვდომი რესურსები და გამოიყენეთ ისინი: მშობლებმა ერთად უნდა მოიძიონ რესურსები, იქნება ეს ინტერნეტში განთავსებული სტატია, მშობლებისთვის შექმნილი სხვადასხვა ჯგუფი, ლაქტაციის კონსულტანტი, ძიძა ან სხვა. მოგეხსენებათ, რომ ბავშვის აღზრდა ერთი ადამიანის საქმე ნამდვილად არ არის.

დაეხმარეთ დედას, დაიწყოს და გააგრძელოს ძუძუთი კვება: ძუძუთი კვებას დიდი ძალისხმევა, ბევრი ენერგია, დრო და მზრუნველობა სჭირდება, განსაკუთრებით დასაწყისში, სანამ ბავშვი ძუძუზე სწორად მოჭიდებას და წოვას ისწავლის. დედობის და ძუძუთი კვების პირველი რამდენიმე კვირა ემოციურადაც ძალიან დამღლელია. სირთულეების შემთხვევაში ექიმმა შეიძლება ლაქტაციის კონსულტანტის დახმარება ან გამოსაწველი მოწყობილობის შეძენა გირჩიოთ. პარტნიორი უნდა დაეხმაროს დედას ამ სირთულეების გადალახვაში, რადგან გრძელვადიან პერსპექტივაში ძუძუთი კვება უფრო ნაკლებ დროს მოითხოვს, ვიდრე ბოთლით კვება, ეხმარება ქალს მშობიარობის შემდეგ პერიოდში და ფინანსურადაც ძალიან დამზოგველია.
დაიცავით მისი საზღვრები: პარტნიორს შეუძლია დაიცვას მეძუძური დედის საზღვრები, დაზოგოს მისი დრო და ენერგია. მაგალითად, როდესაც სტუმარი მოვა, პარტნიორს შეუძლია შეეგებოს მას და უთხრას, რომ ახალბედა დედას მარტო ყოფნა და დასვენება სჭირდება.

იზრუნეთ მზრუნველ დედაზე: დაეხმარეთ დედას აღიდგინოს ძალები, რათა მან სრულყოფილად შეძლოს პატარაზე ზრუნვა. ამის მისაღწევად შეგიძლიათ გააკეთოთ შემდეგი:

•  პატივი ეცით მის საზღვრებს შეხებასთან დაკავშირებით.ზოგიერთი მეძუძური დედა ძალიან გადაღლილია შეხებით და არ სურს პარტნიორისგან ზედმეტი შეხება. სხვებს კი დამატებითი ალერსი სჭირდებათ, რადგან ბავშვის მოვლისას ძალიან ბევრს გასცემენ. პატივი ეცით მის საჭიროებებს და გახსოვდეთ, რომ ეს ყველაფერი დროებითია და მალე თქვენი ურთიერთობა ნორმას დაუბრუნდება. 
• დაეხმარეთ დაიკმაყოფილოს ბაზისური საჭიროებები კვებასთან, ძილთან, მარტო ყოფნასთან, აბაზანის მიღებასა და ვარჯიშთან დაკავშირებით.ამ ბაზისური საჭიროებების დაკმაყოფილება ბუნებრივი და მარტივია ბავშვის დაბადებამდე, თუმცა ახალბედა დედას შეიძლება ძალიან გაუჭირდეს საკუთარი თავის მოვლისთვის დროის გამონახვა. პარტნიორმა უნდა შეამოწმოს, დაკმაყოფილებულია თუ არა მეძუძური დედის ბაზისური საჭიროებები და დაეხმაროს მას თავის მოვლაში.
• ხელი შეუწყვეთ ახალბედა დედას სოციალიზაციაში.
• დედობა დასაწყისში შეიძლება სოციალურად ძალიან შემზღუდავი აღმოჩნდეს და დედამ თავი იზოლირებულად იგრძნოს. ამ დროს პარტნიორს შეუძლია დაეხმაროს მას სოციალიზაციაში, როცა ამისთვის მზად იქნება, სტუმრების სახლში დაპატიჟებით ან მეგობრებთან სტუმრად წასვლის ორგანიზებით. პარტნიორს ასევე შეუძლია დაუმტკიცოს დედას, რომ საზოგადოებაში ძუძუთი კვება ჩვეულებრივი მოვლენაა, რაც მას უფრო კომფორტულად აგრძნობინებს თავს. მას შეუძლია ძუძუთი კვების დროს დედის გვერდზე ამაყად იჯდეს ისეთი პოზით, რომელიც თავდაჯერებულობას აჩვენებს და გარშემო მყოფებთან მეგობრული თვალით-თვალთან კონტაქტი დაამყაროს.
• გაუწიეთ პრაქტიკული დახმარება: პარტნიორს შეუძლია სახლში ძუძუთი კვებისთვის განკუთვნილი კუთხე მოაწყოს კომფორტული სკამით, ბალიშებით, მაგიდით, რომელზეც ძუძუთი კვების დროს გამოსაყენებელი ნივთები, ჩაი, წასახემსებლები იქნება. ასევე შეუძლია გადაიბაროს საოჯახო საქმე, საჭმლის მომზადება და უფროს შვილებზე ზრუნვაც. ან თუ თავად ვერ ახერხებს ამ ყველაფერს, მოიძიოს სხვა დამხმარე, ოჯახის წევრი ან დაიქირაოს მომვლელი ან დამლაგებელი.

დაუახლოვდით პატარას: აბანავეთ ბავშვი, აიყვანეთ ის ხელში და განახორციელეთ კანით კანთან კონტაქტი, გამოუცვალეთ საფენი, გაუკეთეთ მასაჟი და ეთამაშეთ მას.
გადაიღეთ ფოტოები: შეიძლება ამჟამად ასე არ გეჩვენებოდეთ, მაგრამ ძუძუთი კვება თქვენი ცხოვრების ძალიან მცირე მონაკვეთია. მომავალში ძალიან დააფასებთ ამ მოვლენის მოსაგონებელ ფოტოებს და ვიდეოებს. პარტნიორს შეუძლია ამ მოგონებების აღბეჭდვა, ან თუ მოისურვებთ პროფესიონალ ფოტოგრაფთანაც შეგიძლიათ მოაწყოთ ფოტოსესია.
ძუძუთი კვება ერთი შეხედვით ექსკლუზიურად დედასა და ბავშვს შორის ურთიერთობას მოიცავს. თუმცა, ყურადღებიან პარტნიორს შეუძლია ძუძუთი კვების პროცესის წარმატებაში ძალიან დიდი წვლილი შეიტანოს. 
 

წყარო: llli.org