მასტიტი (სარძევე ჯირკვლის ანთება) ვითარდება იმ შემთხვევაში, თუ დახშული სადინრის გამავლობა არ აღდგება. რძის დენის შეფერხება შესიებას და ანთებას იწვევს. ამ დროს მკერდი მგრძნობიარე, მტკივნეული და თბილია. თქვენ ასევე შეიძლება გქონდეთ გაციების მსგავსი სიმპტომები. სტრესი ზრდის მასტიტის განვითარების რისკს. სიმპტომების გამწვავების პერიოდში სარძევე ჯირკვალში რძის პროდუქცია შეიძლება შემცირდეს. თუმცა, ამ დროს მნიშნელოვანია ბავშვმა განაგრძოს ძუძუთი კვება გამაგრებული ძუძუდან, რათა ანთება აბსცესად არ ჩამოყალიბდეს. მასტიტის მქონე ძუძუდან მიღებული რძე ბავშვს არ ავნებს.
მასტიტის დროს შეგიძლიათ მიმართოთ ზემოთ მოცემულ სამკურნალო ღონისძიებებს და მასთან ერთად მიჰყვეთ შემდეგ სამკურნალო გეგმას:
მასტიტის სამკურნალო გეგმა:
თუ თქვენ:
• გაქვთ გაწითლებული უბნები მკერდზე,
• ძუძუზე გრძნობთ მტკივნეულ კვანძს,
• გაქვთ სუბფებრილური ტემპერატურა (38,4 გრადუსზე ნაკლები),
მაშინ:
• დაისვენეთ რაც შეიძლება მეტი.
• გამოკვებეთ ბავშვი ძუძუთი დღე-ღამეში 8-12-ჯერ, ორივე ძუძუდან.
• ბოლომდე გამოიწველეთ რძე კვების შემდეგ, თუ ძუძუ მთლიანად არ იცლება.
• დაიმასაჟეთ ძუძუ და ზეწოლა მოახდინეთ მასზე, როცა ბავშვი კვებისას პაუზას აკეთებს.
• კვებამდე დაიდეთ მკერდზე თბილი კომპრესი, რაც რძის დენას ხელს შეუწყობს.
თუკი:
• ვერ ამჩნევთ უკეთესობას მომდევნო 8-24 საათის განმავლობაში,
• გიგრძელდებათ სუბფებრილური ტემპერატურა, ან უეცრად ტემპერატურა აიწევს 38,4 გრადუსზე მაღლა,
• თქვენი მკერდი გახდება უფრო წითელი, უფრო შესივდება ან უფრო გაცხელდება,
• რძეში ჩირქს ან სისხლს შეამჩნევთ,
• ძუძუს თავიდან იღლიამდე შეამჩნევთ წითელ ზოლს,
• დახეთქილი ძუძუს თავი დაინფიცირდება,
• გექნებათ შემცივნება და თავს იგრძნობთ უარესად,
მაშინ:
• დაურეკეთ თქვენს ექიმს.
• თუ ექიმი გამოგიწერთ ანტიბიოტიკს, აუცილებლად ჩაიტარეთ სრული კურსი.
• დაისვენეთ და მიიღეთ დიდი რაოდენობით სითხე.
• განაგრძეთ ხშირი ძუძუთი კვება დაავადებული ძუძუდან (ან გამოიწველეთ რძე, თუ ბავშვი უარს ამბობს, ან ვერ ახერხებს ამ ძუძუდან რძის მიღებას).
• ძუძუთი კვებისას დაიმასაჟეთ მკერდი.
გახსოვდეთ: ხშირად მასტიტს ძუძუზე არასწორი მოჭიდება და ბავშვის არასწორი პოზიცია იწვევს ძუძუთი კვების დროს, რადგან ბავშვი ძუძუს ეფექტურად ვერ წოვს.
მასტიტის და სარძევე სადინრის დახშობის განმეორებით განვითარების თავიდან ასაცილებლად აუცილებელია ბავშვი გამოკვებოთ ხშირად და რეგულარულად, ყურადღება მიაქციოთ ძუძუზე სწორ მოჭიდებას და სწორ პოზიციას, მიჰყვეთ ჯანსაღი ცხოვრების წესს და დაისვენოთ საკმარისად.
რეკურენტული, ანუ განმეორებადი, მასტიტის ყველაზე ხშირი მიზეზია ანთების გამომწვევი ბაქტერიების რეზისტენტობა ანტიბიოტიკების მიმართ, არასწორი ანტიბიოტიკით მკურნალობა, მკურნალობის არასრული კურსის ჩატარება, დაავადებული ძუძუდან კვების შეწყვეტა და მასტიტის გამომწვევი თავდაპირველი მიზეზის მოუგვარებლობა.
თუ მასტიტი განმეორებით განგივითარდებათ, ექიმი მოახდენს გამომწვევი ბაქტერიის კულტივირებას და განსაზღვრავს მის ანტიბიოტიკომგრძნობელობას, რათა გაიგოს რომელი ანტიბიოტიკი მოერევა მას ყველაზე უკეთ.
წყარო: llli.org
სკოლები 
საბავშვი ბაღები 
განმავითარებელი წრეები 
სტარტაპერები 
შოპინგი 
ექიმები 
დასვენება 
გართობა 