ძილი ორსულობის დროს: რჩევები ძილის გასაუმჯობესებლად

ორსულად ხართ და ძილი გიჭირთ? ამ სტატიაში გაიგებთ, რა იწვევს დაღლილობას ორსულობისას, რა გავლენას ახდენს ორსულობა ძილზე, როგორ შეამციროთ დისკომფორტი და გეძინოთ უფრო მშვიდად და ხარისხიანად. 
ორსულობა ორგანიზმს დიდ დატვირთვას აყენებს. ძილი ამ დროს განსაკუთრებით საჭირო და მნიშნელოვანია. თუმცა, ის შეიძლება სულაც არ იყოს თქვენთვის  მარტივად მისაღწევი. 
რატომ იწვევს ორსულობა დაღლილობის შეგრძნებას?
ორსულობის ადრეულ ეტაპზე ჰორმონ პროგესტერონის დონე იზრდება და მეტაბოლიზმი აქტიურდება. ამან შეიძლება დღისით ძილიანობა და დაღლილობის შეგრძნება გამოიწვიოს. 
რა გავლენას ახდენს ორსულობა ძილზე?
ორსულობისას შეიძლება მრავალი სიმპტომი გვაწუხებდეს, რაც ხშირად ძილში ხელს გვიშლის. ესენია:
•    გულისრევა და ღებინება
•    ხშირი შარდვა
•    ფიზიკური დისკომფორტი: მკერდის გაზრდილი მგრძნობელობა და წელის ტკივილი
•    ნაყოფის მოძრაობა
•    კიდურების დაძაბულობა
•    გულძმარვა
•    საშვილოსნოს არარეგულარული შეკუმშვები
•    სუნთქვის გაძნელება
•    შფოთვა 

ასევე, უკვე არსებული ძილის დარღვევები მწვავდება ორსულობისას.

რომელი პოზაა საუკეთესო ძილისთვის?
•    გვერდზე წოლა. არ დაწვეთ ზურგზე, ამ დროს ხდება ზეწოლა საშვილოსნოზე, ხერხემალზე ან ზურგის კუნთებზე.
•    გამოიყენეთ ბალიშები. სცადეთ ბალიშის მოთავსება მოხრილ მუხლებს შორის გვერდზე წოლისას. ასე შეიძლება თავი გაცილებით უფრო კომფორტულად იგრძნოთ.

რა შეგვიძლია გავაკეთოთ დასვენებისთვის კომფორტის შესაქმნელად?
•    მოიწყვეთ ძილის წინა რელაქსაცია:  ჩაბნელებული, ჩუმი გარემო, სადაც თქვენთვის კომფორტული ტემპერატურაა, დაგეხმარებათ ძილში. ერთსა და იმავე დროს დაძინება და გაღვიძება შეიძლება ასევე სასარგებლო აღმოჩნდეს. არ გამოიყენოთ ელექტრომოწყობილობები ძილის წინ. 
•    შეინარჩუნეთ ფიზიკური აქტივობა: რეგულარული ფიზიკური აქტივობა დაგეხმარებათ სწრაფად და იოლად ჩაძინებაში..
•    თავიდან აიცილეთ გულძმარვა: მიირთვით ხშირად, მცირე ულუფებით, არ მიირთვათ დაძინებამდე 3 საათით ადრე, დაწექით მარცხენა მხარეს, ეცადეთ თავი გედოთ მაღლა. 
•    სცადეთ რელაქსაციის ტექნიკები: იოგა, მედიტაცია, სუნთქვითი ვარჯიშები. მათი ყოველ ღამე, ძილის წინ გაკეთება შეიძლება სასარგებლო აღმოჩნდეს.
თუ დამოუკიდებლად ვერ უმკლავდებით პრობლემას, მიმართეთ ექიმს. ერთ-ერთი მკურნალობის მეთოდი კოგნიტურ-ბიჰევიორული თერაპიაა. ეს მეთოდი დაგეხმარებათ ამოიცნოთ და შეცვალოთ ის ფიქრები ან ქცევები, რომლებიც ხელს გიშლიან ძილში და ჩაანაცვლოთ ისინი სასარგებლო ჩვევებით. მძიმე, ხანგრძლივი ინსომნიის შემთხვევაში შეიძლება საჭირო გახდეს მედიკამენტის მიღება.

წყარო: mayoclinic.org