თქვენი ახალშობილის პირველი კვირა სახლში

გაიცანით თქვენი პატარა

სანამ ახალშობილზე საუბარს დავიწყებდეთ, მოდით ჯერ განვსაზღვროთ ტერმინი "ახალშობილი", რადგან, როგორც წესი, ამ გამოთქმაში ხშირად სხვადასხვა რამ იგულისხმება ხოლმე. თუ ახალდაქორწინებულები აღარ ითვლებიან ახალდაქორწინებულებად თაფლობის თვის შემდეგ, ახალშობილებისთვის ეს დრო 28 დღით განისაზღვრება, ასეა დამტკიცებული მედიკოსების მიერ. 28 დღე დაბადების მომენტიდან, უფრო სწორად კი ჭიპლარის გადაჭრის მომენტიდან, მომენტიდან, როდესაც ნაყოფი შორდება დედის სხეულს.  

ახლა რაც შეეხება სიტყვას "თქვენი"...

მას შემდეგ, რაც ახალშობილთან ერთად დატოვებთ  სამშობიარო სახლს, ბავშვი ხდება თქვენი და მასზე პასუხისმგებლობაც მხოლოდ თქვენ გეკისრებათ.   
პირობები, რომელიც ბავშვს სახლში დახვდება, ძალიან მნიშვნელოვანია მისი შემდგომი განვითარებისთვის. 

ხალხში არსებობს მოსაზრება იმასთან დაკავშირებით, რომ ახალშობილი არის ძალიან სუსტი არსება, რომლის სიცოცხლეც ბეწვზე კიდია.

ასე ფიქრობს ძირითადად უფროსი თაობა, მათ შორის მედპერსონალიც კი, თუმცა, გვინდა დაგარწმუნოთ, რომ ასე არ არის.

• მართალია, ახალშობილი შედარებით სუსტია და ზედმეტად მგრძნობიარე არსებაა, თუმცა სათანადო პირობებში მის სიცოცხლეს საფრთხე ნამვილად არ ემუქრება.
• ახალშობილთან მიმართებაში მთავარი სირთულე მდგომარეობს იმაში, რომ მშობელი ჯერ კიდევ არ იცნობს მას, მის უნარ-ჩვევებს, რომელიც ბავშვს ყოველდღიურად უვითარდება, ამიტომ დედამ არ იცის, რას უნდა ელოდოს შვილისგან ამა თუ იმ სიტუაციაში.
• როგორც წესი, მშობლები საკუთარი გამოცდილებით ხელმძღვანელობენ ხოლმე და ჰგონიათ, რომ ბავშვი იმავეს გრძნობს, რასაც თავად განიცდიან, თუმცა ასე არ არის. დროა ეს სტერეოტიპი დაიმსხვრეს. მიუხედავად იმისა, რამხელაა ბავშვი, ახალდაბადებული თუ მოზრდილი, ის არის ცალკე ინდივიდი, განსხვავებული სხვისგან, საკუთარი სურვილებით და მოთხოვნილებებით.
• ახალშობილები განსხვავდებიან ერთმანეთისგან განვითარების დონით, ვინ როდის დაიბადა, როგორ დაიბადა და ა.შ. ზოგი შვიდთვიანი იბადება, ზოგი აგვიანებს, ზოგი ბუნებრივი გზით, ზოგიც საკეისრო კვეთით და ა.შ. ეს ძალიან მნიშვნელოვანი დეტალებია. 

ასე რომ, მოდით შევთანხმდეთ, რომ ჩვენ ვისაუბრებთ ჯანმრთელ ახალშობილზე, რომელიც დაიბადა თავის დროზე გარკვეული გართულებების გარეშე ფიზიოლოგიური გზით.  
ბავშვის პირველადი ჯანმრთელობის მდგომარეობა ფასდება ექიმების მიერ უშუალოდ სამშობიარო ბლოკში. აღნიშნული ინფორმაცია ფიქსირდება საბუთებში, რომელიც გადაეცემა მშობელს სამშობიაროდან გაწერის დროს, იქ მითითებული იქნება, რომ ბავშვი შეფასდა მაგალითად 8-9 ქულით აპგარის შკალით. 

ყველამ არ იცის, ვინ არის ან რა არის აპგარი. ბევრს ჰგონია, რომ ეს აბრევიატურაა და მის გაშიფვრას ცდილობენ ხოლმე, თუმცა გეტყვით, რომ ეს გახლავთ ამერიკელი ქალბატონის, ანესთეზიოლოგის გვარი. სწორედ ქალბატონმა აპგარმა წარმოადგინა შკალა, რომლიც მოიცავს შეფასების 5 კომპონენტს. ამ კომპონენტების მეშვეობით შეიძლება დადგინდეს რამდენად ჯანმრთელია ბავშვი, ან პირიქით. ეს კომპონენტები გახლავთ: გულისცემა,  სუნთქვა, კუნთოვანი ტონუსი, რეფლექსები და კანის შეფერილობა. თითო კომპონენტი ფასდება 2-3 ქულით და საბოლოოდ ჯამმა უნდა შეადგინოს 10. 

კიდევ ერთხელ აღვნიშნავთ ხაზგასმით, რომ აპგარის მიხედვით შეფასება მხოლოდ თეთრხალათიანთა საქმეა. მაშ ასე, თქვენ უკვე სახლში ხართ და იწყება მთავარი თავგადასავალი.