როგორ მივაჩვიოთ ბავშვი სპორტს და ჯანსაღი ცხოვრების წესს

თქვენს შვილს ეზოში სირბილსა და თამაშზე მეტად დროის კომპიუტერთან გატარება მოსწონს, არ უყვარს ფიზიკური აქტივობები? არცთუ საუკეთესო ფიზიკური ფორმის გამო კომპლექსი აქვს და ეს გაღელვებთ? გვინდა დაგამშვიდოთ, მართალია, თუ ბავშვს ამის მოთხოვნილება და სურვილი არ აქვს, ძნელია შეაყვაროთ ფეხბურთის ან კალათბურთის თამაში, თუმცა არსებობს გარკვეული აქტივობები, რომლებიც ნელ-ნელა, ეტაპობრივად შეცვლის თქვენი შვილის დამოკიდებულებას ფიზიკური აქტივობების მიმართ. საბოლოოდ შეიძლება ფეხბურთელი არ გამოვიდეს, თუმცა მისი დატვირთვები, ფიზიკური აქტივობა და სუფთა ჰაერზე გატარებული დროც აუცილებლად გაიზრდება, რაც ჯანმრთელობის  მთავარი საწინდარია. 

1. პირველი, რაც მშობელმა კარგად უნდა დაიმახსოვროს, გახლავთ ის, რომ ბავშვს არ სჭირდება ისეთი ფიზიკური ვარჯიშები, როგორიც უფროსებს სჭირდებათ. ბავშვისთვის სულაც არ არის აუცილებელი მოზრდილივით დატვირთვა ან ერთი და იგივე მოძრაობების ბევრჯერ გამეორება, მისთვის უბრალოდ სირბილიც საკმარისია, ამიტომ, თუ გადაწყვიტეთ, რომ ფიზიკურად მეტად დატვირთოთ, გახდით მისი არა მწვრთნელი, არამედ პარტნიორი თამაშში, ეთამაშეთ. 
2. არ მოახვიოთ ბავშვს საკუთარი ინტერესები და გატაცებები, ნუ ეცდებით ჩაუნერგოთ, რომ თუ უნდა ჯანმრთელი იყოს, ბევრი უნდა ივარჯიშოს. დაუკვირდით, რა მოსწონს ყველაზე მეტად, მაგალითად, თუ კითხვა უყვარს, შეეცადეთ შეაპაროთ, რომ სირბილი ხელს უწყობს ტვინის განვითარებას და ვინც მეტს დარბის, უკეთ იგებს წაკითხულს და მეტსაც კითხულობს. 
3. შეიძლება, თამაშ-თამაშში აღმოაჩინოს, რომ ფეხბურთი, კალათბურთი, ბადმინტონი, ფრენბურთი ან რაღაც მსგავსი მოსწონს თურმე. თუ არ მოსინჯავს, ვერც გაიგებს. ამიტომ დაეხმარეთ.
4. თუ მშობელი მოინდომებს, ისე შეძლებს შვილის დატვირთვას ფიზიკურად, რომ ბავშვი ამას ვერც კი მიხვდება, მაგალითად გაასეირნებინებს საყვარელ ლეკვს.
5. შეიძლება, ველოსიპედით დაინტერესდეს - ფიზიკური აქტივობისთვის ესეც შესანიშნავი საშუალებაა. თუ გაქვთ გარშემო უსაფრთხო გარემო, წაახალისეთ, ველოსიპედის ტარება ისწავლოს.
6. აუცილებლად გაარკვიეთ, რატომ არ მოსწონს თქვენს შვილს სპორტი, რაიმე კონკრეტული მიზეზი ხომ არ არსებობს საამისოდ. თუ საჭიროდ ჩათვლით, შესაძლოა დახმარებისთვის ბავშვთა ფსიქოლოგსაც კი მიმართოთ. 
7. ექსპერტები ამტკიცებენ, რომ ბავშვი სპორტით დღეში მინიმუმ ერთი საათი მაინც უნდა იყოს დაკავებული, მაგრამ ეს იმას როდი ნიშნავს, რომ ბავშვს უნდა გამოუცხადოთ ამის შესახებ. ეცადეთ მასთან ერთად ისე იაქტიუროთ, რომ ის ვერც მიხვდეს, რა ხდება, აქტივობის დრო კი ნელ-ნელა გაზარდეთ. იმისათვის კი, რომ ეს აქტივობები უფრო სახალისო იყოს, ეცადეთ მასში მთელმა ოჯახმა მიიღოთ მონაწილეობა. თუ ეზო იძლევა საშუალებას და არიან გარშემო მისი თანატოლები, წაახალისეთ, გაატაროს დრო ეზოში ბავშვებთან ერთად. თუ უჭირს ახალი ურთიერთობების აწყობა და ბავშვების გაცნობა, ამაშიც შეგიძლიათ დახმარება, მერე კი თავად ბავშვები ააწყობენ ურთიერთობებს.