პროფესორი, თბილისის სახელმწიფო სამედიცინო უნივერსიტეტის ბავშვთა და მოზარდთა მედიცინის დეპარტამენტის ხელმძღვანელი ყარამან ფაღავა გვესაუბრება, როგორი უნდა იყოს ბავშვების კვების რაციონი და რა უნდა გაითვალისწინონ მშობლებმა:
დღესდღეობით, მიღებულია და მეც მიმაჩნია, რომ ჯობს, ბავშვმა დღის განმავლობაში ხუთჯერ იკვებოს. აქედან, 3 ძირითადი კვება იქნება, ხოლო ორი -წახემსება. წახემსების დროს შეიძლება გამოიყენოს ვაშლი, რაიმე მსუბუქი პროდუქტი, თუმცა ჯამში 5-ჯერადი კვებაა მნიშვნელოვანი. საღამოს 9-10 საათის შემდეგ საკვები პროდუქტების მიღება აღარაა სასურველი. ამიტომ, ძირითადი კვება და წასახემსებელი გაღვიძებიდან სწორედ დროის ამ შუალედამდე უნდა გადანაწილდეს.
-რაც მეტ სითხეს მიიღებს, მით უკეთესია, რადგან მათ უფრო დიდი რაოდენობით სჭირდებათ, ვიდრე ზრდასრულებს. ბავშვების შემთხვევაში, ერთ კილოგრამზე, დაახლოებით, 50-60 მილილიტრია საჭირო. ძირითადად, სითხეში წყალი იგულისხმება, რადგან მასზე უკეთესი რამ არ არსებობს. შეიძლება მშობლებმა გამოიყენონ წვენებიც, თუმცა ზომიერად.
-კაკაო სიფრთხილით უნდა მივცეთ, ზოგჯერ ალერგიას იწვევს. რძის ნაწარმი ძალიან კარგია, თუმცა ზოგიერთ ბავშვს რძის ცილაზე აუტანლობა აქვს. პროცესს დედაც უნდა დააკვირდეს. თუ ბავშვს რძე არ უყვარს და დალევის შემდეგ თავს არაკომფორტულად გრძნობს, ნუ დააძალებთ. თუ მოსწონს, ცხადია, უნდა მიირთვას. დიეტოლოგიაში დაკვირვების ჟურნალი ძალიან მნიშვნელოვანია. კვების დარღვევებმა შესაძლოა გამოიწვიოს ფაღარათი, ალერგია და სხვა. ამიტომაც, წინასწარ, შეუძლებელია მშობელს უთხრა, რომელი პროდუქტი არ შეიძლება, რადგან ყველა ორგანიზმი ინდივიდუალურია. ჯობს, დედას საერთო რვეული ჰქონდეს, სადაც 0-დან 10-მდე ქულით აღრიცხავს, რომელ პროდუქტზე, რა ტიპის გვერდითი მოვლენა გამოუვლინდა მის შვილს, დაეწყო ფაღარათი, გამონაყარი თუ სხვა პრობლემა. კვების მოდელიც შესაბამისად უნდა შეარჩიოს. უხშირესად, ფაღარათის თვალსაზრისით უფრო საფრთხილოა ქონიანი, ზეთიანი საჭმელი. ალერგიის კუთხით კი, აუცილებლად უნდა ვიცოდეთ, რომ არსებობს საკვები, რომელსაც ეს გართულება შეუძლია გამოიწვიოს. მაგალითად, შოკოლადი, კაკაო, ნიგოზი, თხილი, თაფლი, ციტრუსი, მარწყვი, ზოგჯერ - კვერცხი, თევზი, სოკო. ცხადია, კონსერვი, ძეხვეული, გაზიანი სასმელი, არაჯანსაღი საკვები არაა სასურველი.
რაც შეეხება კომპოტებსა და მურაბებს, მესმის, რომ გემოს თვალსაზრისით მისაღები პროდუქტებია, თუმცა არანაირი სარგებელი არ აქვთ. რადგანაც, ხარშვის დროს ხილში არსებული ვიტამინები იშლება. აქიდან გამომდინარე, ჯობს, ბავშვმა ხილი ცოცხლად, ჩირის ან გაყინული სახით მიიღოს. სიცხეში კომპოტი შეიძლება მცირე რაოდენობით მივცეთ, მაგრამ შაქარს ნუ დავუმატებთ. მურაბასა და კომპოტებში გარდა იმისა, რომ ხარშვის დროს ვიტამინებს ვკლავთ, ასევე, დიდი რაოდენობით შაქარს ვუმატებთ, რაც, რა თქმა უნდა, არასასურველია. ახალგამოწურული წვენი სასარგებლოა, თუმცა, კვლავ ვიმეორებ, თუ ბავშვს დიდი რაოდენობით ვაძლევთ, შეიძლება ფაღარათი განვითარდეს. რაც შეეხება ჩაის, მაგარ ჩაის ნუ დავალევინებთ და მინიმალური შაქრით შევთავაზოთ.
-ჯანმრთელობის მსოფლიო ორგანიზაციის მიერ კვების სპეციალური თეფშია შერჩეული, სადაც ყველაზე დიდ ადგილს მარცვლეული და ხილბოსტნეული იკავებს, შემდეგაა, რძის ნაწარმი, ხორცი, თევზი, ცილა და სულ მცირე ადგილია გამოყოფილი ჩასაკოკლოზინებელისთვის - ტკბილეული, ძალიან ცხიმიანი საკვები. იმის გათვალისწინებით, რომ პანდემიიდან გამომდინარე, ბავშვები ნაკლებად მოძრაობენ, მარცვლეულის ულუფები შევამციროთ და გავზარდოთ ხილისა და ბოსტნეულის როლი. დილით შესაძლოა ბავშვმა მიიღოს ჩაი, კარაქი, პური, ყველი, თუ ალერგია არ აქვს, თაფლი. ასევე, მაწონი, ხაჭო, ორცხობილა, ფაფა. სადილზე ბოსტნეულის სუფი ძალიან კარგია, ასევე, თევზი, ხორცი. საღამოს კვება კი მსუბუქი უნდა იყოს.
-სიხშირეზე მეტად რაოდენობაზე უნდა გავაკეთოთ აქცენტი. ერთი უნდა ვიცოდეთ, ჭარბი რაოდენობით ხორცის მიღება არ არის სასარგებლო. ხორციც და ზოგადად, ცილა, ბავშვებს ოპტიმალური რაოდენობით უნდა მივცეთ. წინათ, მშობლებს რეკომენდაციას ვაძლევდით, რომ 1 კილოგრამ წონაზე 1 გრამი ცილა შეეტანათ რაციონში (სპეციალური ტაბულებია ინტერნეტში). თუმცა, ჯობს, 0,8 გრამი გავითვალისწინოთ. ამიტომაც, შესაძლოა ბავშვმა ყოველდღე მიირთვას თევზი და ხორცი, მაგრამ რაოდენობა უნდა გავითვალისწინოთ.
-რაიმე განსაკუთრებული ჭურჭლის შერჩევა არ არის საჭირო. მთავარია, ემალირებული ჭურჭელი, იქნება ეს ქვაბი თუ ტაფა, არ იყოს დაზიანებული, რადგან ამ დროს არსებობს საფრთხე, რომ მომწამვლელი ნივთიერებებისაჭმელს შეერიოს. პროდუქტების მომზადების წესიც უნდა გავითვალისწინოთ. შემწვარ საკვებზე უარის თქმა ძნელია, მაგრამ უმჯობესია, შვილებს მოხარშული ან ორთქლზე მომზადებული შევთავაზოთ.
-კვლავ აღვნიშნავ, ზომიერი რაოდენობით ფაფეული, რძის ნაწარმი, ხილი, ბოსტნეული და ცილოვანი პროდუქტი.
სკოლები 
საბავშვი ბაღები 
განმავითარებელი წრეები 
სტარტაპერები 
შოპინგი 
ექიმები 
დასვენება 
გართობა 