როგორ გავაღვიძოთ ბავშვი მარტივად და უშფოთველად?

როგორ გავაღვიძოთ ბავშვი? 

ხშირია შემთხვევა, როდესაც ბავშვს უჭირს დილით გაღვიძება ან ისტერიკები ემართება და უარს აცხადებს ბაღში ან სკოლაში წასვლაზე. სიტუაცია ალბათ ბევრ მშობელს ეცნობა. დილის განწყობაზე კი მთელი დღეა დამოკიდებული.
სიმკაცრე, აგრესია და უხეშობა არავის სიამოვნებს და მით უმეტეს მცირეწლოვან ბავშვს. თუ ბავშვს უჭირს დილთ გაღვიძება, მას უნდა დაეხმაროთ, აგრესია და გაბრაზება კი მაქსიმალურად უნდა განაგდოთ.  არსებობს ასევე რამდენიმე რეკომენდაცია, რომელთა გათვალისწინებაც კარგი იქნება.

• არ გირჩევთ შუქის უცებ ანთებას ან მუსიკის ხმამაღლა ჩართვას. 
• არც ხმამაღლა საუბარი, მით უმეტეს, ყვირილია სასურველი. 
• წყლის დასხმაზე აღარაფერს ვამბობთ (დიახ, ასეთი პრეცედენტებიც არის).
• ნეგატიურად მოქმედებს ბავშვის ფსიქიკასა და განწყობაზე მუქარა ან ფიზიკური სასჯელი. 
• არც იმის დემონსტრირებას გირჩევთ, რომ დილის რუტინა, ადრე ადგომა და სამსახურში და სკოლაში ან ბაღში წასვლა მოსაბეზრებელია. 

როგორც უკვე აღვნიშნეთ, აგრესია ბავშვის ფსიქიკაზე ძალიან ნეგატიურად მოქმედებს, ასევე მშობელმა საკუთარი მაგალითით უნდა აჩვენოს ბავშვს, როგორ უნდა მოიქცეს დილით. 

სწორად გაღვიძება წარმატებული დღის საწინდარია

• უმჯობესია დედამ ცოტა ადრიანად დაიწყოს ბავშვის შეღვიძება, ვიდრე მერე სირბილ-სირბილით და გაღიზიანებულმა გააკეთოს ეს, რომ არ დააგვიანდეს.
• შეგიძლიათ ბავშვს უთხრათ, რომ დღეს მშვენიერი დილაა და სკოლაში თუ ბაღში მას საინტერესო დღე და სახალისო თამაშები ელოდება. 
• სკოლის მოსწავლე შეგიძლიათ დააინტერესოთ ამა თუ იმ საინტერესო ისტორიით, საკვანძო მომენტში კი საძინებლიდან გახვიდეთ, რომ ბავშვმა ვეღარ მოითმინოს და ინტერესით გამოგყვეთ უკან. 
• შეგიძლიათ გაუღვივოთ მადა, სასიამოვნო საუზმემ, საყვარელი ორცხობილის სურნელმა შესაძლოა ის უმტკივნეულოდ წამოაყენოს საწოლიდან. 
• ნუ დააძალებთ გაღვიძებისთანავე შევარდეს აბაზანაში კბილების გასახეხად, აცადეთ 10-15 წუთი საწოლში ნებივრობა. 
• თუ ბავშვი 6 წელს გადაცილებულია, შეგიძლიათ მაღვიძარაც უყიდოთ, თავი ზრდასრულად რომ იგრძნოს.
• მაღვიძარა ისე დადეთ, რომ მის გამოსართავად ბავშვს საწოლიდან ადგომა უწევდეს. 
• სწორი დღის რეჟმი და საკმარისი ძილი დილით მკვირცხლად ადგომის საწინდარია, ეცადეთ ბავშვი დროულად დააწვინოთ დასაძინებლად და ძილის წინ არ ითამაშოს კომპიუტერული თამაშები.